Është zhvilluar këtë të premte seanca e radhës për ish-kryebashkiakun e Bulqizës Lefter Alla. Pas disa muajsh hetime, Prokuroria e Posaçme ka faktuar se ish-kryebashkiaku Lefter Alla dhe nëpunësit e tjerë të Bashkisë Bulqizë kanë abuzuar me tenderin për ujësjellësin e qytetit, i cili kapte vlerën e 3 milionë eurove.
Si rrjedhojë SPAK ka kërkuar këtë të premte 3 vite e 6 muaj burg për Lefter Allën, i cili me gjykim të shkurtuar merr 2 vite e 4 muaj dhe po ashtu për 5 vite ai ndalohet të ushtrojë funksione publike.
Për 10 të pandehurit e tjerë të kësaj dosjeje SPAK ka kërkuar në total 26 vite e 6 muaj burg, ndërsa çështja është ndarë për Ana Nishkun dhe Kastriot Ibrahimajn të cilët do të gjykohen jo në procedurë të përshpejtuar.
Lefter Alla u arrestua në 16 Mars 2023 bashkë me të tjerët, 7 prej tyre zyrtarë të Bashkisë Bulqizë, për shkelje të barazisë në tendera dhe shpërdorim detyre.
Alla dyshohet se në bashkëpunim me ish-zyrtarët favorizoi dy kompani gjatë procedurës së prokurimit publik me qëllim që më pas punimet për ujësjellësin t’i kryente një kompani, e cila është në administrimin e të afërmit të tij, Aqif Konesha. Që nga momenti i arrestimit, Alla i ka konsideruar akuzat ndaj tij si sulme politike të orkestruara.