Bizneset që ndodhen mes dy lagjeve të qytetit të Bulqizës vijojnë të jenë të përmbytura prej një muaji. Shkak për këtë është bërë uji që mblidhet që nga Qafa e Buallit në të dy anët e luginës. Uji ka dalë mbi rrugën lidhëse mes dy lagjeve, duke bërë që jo vetëm këmbësorët ta kenë të vështirë të kalojnë aty, por edhe automjetet. Niveli i ujit aktualisht është mbi 50 centimetra. Qytetarët që lëvizin në këmbë në këtë zonë detyrohen që të mbahen në kangjella e rrugës pasi e kanë të pamundur që të lëvizin në trotuar për shkak të prezencës së madhe të ujit.
Drejtuesit e mjeteve shprehen se po dëmtojnë makinat pasi uji shkon deri tek motorri i tyre. Sipas tyre, shkak për këtë përmbytje është bërë devijimi i kanalit kullues të ujërave të shiut si dhe bllokimi i tumbinos që e nxjerr ujin nga njëra anë në tjetrën.
Situata vijon e tillë prej afro një muaji, ndërsa deri tani Bashkia Bulqizë nuk ka bërë asgjë për ta zgjidhur këtë problematikë për qytetarët e saj.
