Drejtor i Përgjithshëm i Shërbimeve të Transportit Rrugor Blendi Gonxhja dha sonte lajmin e mirë se në Mat do të ndërtohet qendra e kolaudimit të makinave.
Prej kohësh kryebashkiaku i Matit Agron Malaj kërkoi nga DPSHTRR krijimin e mundësive që afro 5 mijë pronarët e makinave të këtij rrethi të mos udhëtonin drejt Dibrës, mbi 200 kilometra, por ky shërbim të kryhej në Burrel.
Gonxhja nëpërmjet postimi në profilin e tij ndau këtë lajm me matjanët:
Postimi i Blendi Goxhes:
Tjetër LAJM I MIRË! Mati do të bëhet me Qendër të mirëfilltë Shërbimesh të Transportit Rrugor, Kontroll Fizik e Teknik/Linjë Kolaudimi, Linjë Tahografi, për tërë shërbimet me mjetin dhe me drejtuesin e mjetit njësoj si në çdo drejtori rajonale, në shërbim të Bashkive Burrel dhe Klos, ku kemi rreth 6,000 mjete rrugore dhe mbi 13 mijë drejtues mjeti!
I vijmë në ndihmë komunitetit duke shkurtuar distancat, ulim kostot për sektorin dhe u kursejmë kohë qytetarëve dhe subjekteve që për kryerjen e shërbimeve me mjetin, për testime, certifikime e praktika të shumta duhet të udhëtonin drejt Peshkopisë, me një distancë rreth 162 km (3 orë e 20 minuta mesatarisht vajtje – ardhje)!
Së bashku me Bashkinë Burrel kemi përcaktuar truallin e duhur, të aksesueshëm dhe të mjaftueshëm, status shtet, dhe po punojmë me ASHK për kalimin e truallit në pronësi të DPSHTRR, për të vijuar me alokimin e fondit, projektin e detajuar dhe kryerjen e investimit brenda vitit 2023!
Shërbime publike që përmirësojnë jetën e qytetarëve!
