Arrestime të Shumta Pas Dhunës në Protesta: 11 Të Ndaluar, 7 Të Proceduar

Policia ka kryer arrestime dhe ka proceduar penalisht disa persona në vijim të hetimeve për aktet e dhunës së regjistruar gjatë protestave të zhvilluara së fundmi në kryeqytet. Gjithsej, 11 persona, përfshirë dy të mitur, janë arrestuar, ndërsa 7 të tjerë janë proceduar në gjendje të lirë.

Në kuadër të këtyre veprimeve hetimore, është ndaluar edhe një 33-vjeçar, i identifikuar si E. K., i dyshuar për dëmtimin e ambienteve të Komisariatit nr. 3 gjatë demonstratave. Si pasojë e dhunës, 10 punonjës policie mbetën të lënduar.

Shërbimet e Drejtorisë Vendore të Policisë Tiranë njoftuan se në flagrancë u arrestuan shtetasit E. P., 29 vjeç, G. K., 24 vjeç, F. B., 19 vjeç, E. B., 23 vjeç, S. D., 52 vjeç, E. B., 27 vjeç, A. D., 23 vjeç, L. Z., 18 vjeç dhe E. B., 20 vjeç, bashkë me dy të mitur. Gjatë të njëjtit operacion, specialistët për Hetimin e Krimeve në Komisariatin e Policisë Nr. 3 identifikuan dhe ndaluan E. K., i cili dyshohet se ka përdorur sende të forta për të shkaktuar dëme në godinën e komisariatit, e cila u sulmua me lëndë piroteknike, gurë dhe bomba molotov, duke shkaktuar zjarr dhe dëmtime të shumta.

Materialet procedurale i janë referuar Prokurorisë për veprime të mëtejshme. Personat e përfshirë akuzohen për një sërë veprash penale, duke përfshirë “Shkatërrimi i pronës”, “Shkatërrimi i pronës me zjarr”, “Goditjet për shkak të detyrës”, “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të Policisë të rendit publik”, “Prishja e qetësisë publike”, “Mosbindja ndaj urdhrit të punonjësit të policisë së rendit publik”, “Shkelja e rregullave mbi lëndët plasëse, djegëse dhe radioaktive”, “Pengimi i qarkullimit të mjeteve”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”.