Ministri Manja: Drejtoria Antikorrupsion në luftë me faqezinjtë që prekin pensionet tek Posta Shqiptare

0

Ministri i Drejtësisë Ulsi Manja bashkë me ministren Belinda Balluku, ka qenë i pranishëm sot në Drejtorinë e Postës Shqiptare, ku është prezantuar zv/drejtoresha e përgjithshme e këtij institucioni, Laureta Omeri, njëkohësisht edhe koordinatorja e Drejtorisë së Përgjithshme Antikorrupsion në Ministrinë e Drejtësisë.

“Qëllimi është shumë i qartë. Duhet që ta zhveshim këtë institucion nga një mentalitet që po na dëmton çdo ditë. Duhet ta themi hapur: Vendi i punës më i kërkuar në Postën Shqiptare është arkëtari në sportel, pra ku jepen pensionet dhe ndihma ekonomike. Asnjë nuk shkon të kërkojë punë ku përpunohen letrat, zarfat, korrespodenca. Të gjithë duan të bëhen arkëtarë.

Mos të bëjmë bisedë me maska: Është e qartë pse duan tek arka. Tek arka duan sepse duke funksionuar ai sistemi i shpërndarjes së pensioneve me zarfa dhe nisin e bëjnë arkëtarët llogaritë: Nga pensioni i ish-kooperëtivës heq 200 lekë, nga ai i shtetit heq 500 lekë, kur i shkon në shtëpi 1000 lekë”, është shprehur Manja.

Duke u bazuar edhe në informacionet e marra paraprakisht pikërisht nga Drejtoria Antikorrupsion, ai foli dhe për një marrëveshje pothuaj të detyrueshme mes arkëtarëve dhe qytetarëve.

“Pensionisti, invalidi, personi që vjen tek sporteli merr një zarf, firmos e as nuk i numëron në shumicën e rasteve sepse ka një si marrëveshje të heshtur me hajdutët e arkave. Por hajdutët fillojnë që këtu. Këtu ku jemi sot. Korrupsioni nga poshtë shkon lartë, jo nga lartë poshtë. Dikush i mban këta në punë”, ka thënë ministri i Drejtësisë.