Policia ka njoftuar mëngjesin e sotëm nxjerrjen e trupave të pajetë të tre punëtorëve të bllokuar mbrëmjen e kaluar në minierën e ‘Balgjajt’ në Njësinë Administrative Selishtë të Bashkisë Dibër.
Policia informon se nxjerrja e trupave të tyre nga ana e grupit të avari-shpëtimit është bërë e mundur rreth orës 03:00 të mëngjesit të sotëm (29 nëntor).
Viktimat janë shtetasit;
- Ismail Hoxha, 64 vjeç, banues në Peshkopi, me detyrë inxhinier.
- Fatos Çesku, 55 vjeç banues në Peshkopi, me detyrë minator.
- Rruzhdi Rrushiti, 33 vjeç banues në Bulqizë, me detyrë minator.
Mësohet se grupi i avari-shpëtimit nuk ka konstatuar shembje të ndonjë masivi brenda në minierë dhe vdekja e tyre dyshohet të ketë ardhur si pasojë e një shpërthimi të mundshëm gazrash nëntokësorë, çka ka shkaktuar asfiksimin e tyre.
Ngjarja u denoncua fillimisht nga familjarët e të ndjerëve, të cilët në mungesë të kontakteve me ta kanë informuar policinë. Dyshimet për një bllokim të mundshëm brenda në galeri janë shtuar kur në dhomën e zhveshjes janë gjetur telefonat dhe sendet personale të të ndjerëve.
Menjëherë pas njoftimit, policia ka shkuar në vendin e ngjarjes, por efektivët dhe të pranishmit e tjerë nuk janë futur në minierë për shkak të rrezikut nga gazi dhe është kërkuar ndërhyrja e grupit të ekspertëve të avari-shpëtimit nga Tirana.
Miniera e ‘Balgjajt’ ndodhet në një terren shumë të vështirë malor mes Dibrës dhe Matit. Ajo është rreth 3 orë larg nga Peshkopia dhe të vetmet automjete të cilat mund të shkojnë janë ato të transportit të mineralit dhe fuoristradat.
Në foto: Shokët dhe familjarët e të ndjerëve duke pritur në dhomën e zhveshjes për nxjerrjen e tyre.
