Berisha në Protestë: 20 Shkurti, Dita Kur U Përmbys Kulti i Diktatorit
Berisha në Protestë: 20 Shkurti, Dita Kur U Përmbys Kulti i Diktatorit
Tiranë – Ish-Kryeministri Sali Berisha, gjatë fjalës së tij në protestën e katërt kombëtare në bulevardin “Dëshmorët e Kombit”, e ka cilësuar 20 shkurtin si një nga ditët më të shënuara në historinë e Shqipërisë.
Berisha iu referua ngjarjeve të 20 shkurtit 1991, duke kujtuar se dhjetëra mijëra qytetarë të mbledhur në Qytetin e Studentëve, në mbështetje të grevës së studentëve dhe nën thirrjet e artistes Rajmonda Bulku, marshuan drejt sheshit “Skënderbej”. Ky shesh, sipas tij, ishte i rrethuar nga forca të armatosura, përfshirë autoblinda, mitraloza dhe snajperë, në atë që ai e quajti “kulmin e guximit”.
Ai theksoi se rrëzimi i shtatores së ish-diktatorit komunist Enver Hoxha shënoi përmbysjen e një regjimi që për 46 vite kishte persekutuar, burgosur dhe ekzekutuar mijëra shqiptarë, si dhe i kishte varfëruar ata më shumë se çdo pushtues tjetër. "Nderim përjetë atyre guximtarëve," deklaroi Berisha.
Berisha shtoi se ata që morën pjesë në protestën e 35 viteve më parë nuk do ta kishin menduar se pas kaq vitesh do të përballeshin me një regjim që, sipas tij, nuk është identik, por është fatkeqësisht shumë i ngjashëm në shumë aspekte me atë të kaluarin.
