Që prej hapjes për qarkullim të tunelit të Murrizit asnjë përkujdesje nuk është treguar ndaj bypassit. Segmenti nga hyrja e tunelit deri në anën tjetër të fshatit Bastar Murrize është lënë totalisht në mëshirë të fatit, ku dhe ka nisur degradimi i tij.
Në anën e fshatit Xibër – Murrize të Bashkisë Klos ka rënie të vazhdueshme të gurëve por askush nuk i heq për shkak se rruga nuk përdoret më si para 14 Marsit të këtij viti.
Mungesa e mirëmbajtjes së kanaleve kulluese anësore bën që uji të rrjedhë përmes asfaltit dhe nga shpati i malit të shemben gurë.
Ndërkohë, banorët që jetojnë në zonë kërkojnë që ky aks të mirëmbahet jo vetëm se mund të jetë i domosdoshëm në raste emergjente brenda tunelit, por edhe sepse ai i shërben fshatit, por jo vetëm.
Në periudhën pranverë – vjeshtë, zona e Qaf Murrizit frekuentohet në maksimum nga vizitor vendas e të huaj të cilët shijojnë bukuritë natyrore të zonës, por nëse rruga nuk do të mirëmbahet, atëherë sipas banorëve do të bie edhe interesi i turistëve.